Araweelo News Network
Hargeysa(ANN)Xarunta Xuquuqal-insaanka Hargeysa (Hargeisa Human Right Center), ayaa soo saartay warbixin afar bilood leh ah oo ay ku faahfaahisay xadhigga iyo dacwadaha ka dhanka ah suxufiyiinta iyo hay’adaha warbaahinta Somaliland.
Waxa ay warbixinteeda hay’addu ku sheegtay in afartii bilood ee u dambeeyey ee sannadkan la xidhay sagaal suxufi, halka ay dacwadi ku socoto 7 suxufi. Waxa ay si gaar ah farta ugu fiiqday hay’addu in afartii bilood ee u dambeeyey dacwad ciqaab ah lagu soo oogay suxufiyiin oo kala ah Cabdirashiid Cabdiwahaab Ibraahim, Guddoomiyaha Wargeyska Foore Maxamed Maxamuud Yuusuf, Tifaftiraha Foore , Tifaftiraha Hangoolnews Ibraahim Cismaan Axmed iyo Calimahdi Jibriil Xasan oo Telefiishanka Bulsho TV ka tirsana.
Haddaba, warsaxaafadeedka Xarunta Xuquuqal-insaanka ee HRC ka soo saartay warbixinteeda oo uu ku saxeexna Guddoomiyaha Xarunta Guleed Axmed Jaamaac waxa uu u dhigna sidan: “War-bixin afar bilood leh ah oo ay maanta soo saartay Xarunta Xuquuqal Insaanku waxaay sheegtay in afartii bilood ee u danbeeyey (laga soo bilaabo April ilaa August 2016) la xidhay sagaal (9) suxufi. Halka ay hada dacwadi ku socoto todoba (7) suxufi.
Warbixinta ay soo saartay Xaruntu waxaay sheegaysa in shan dacwadood oo ciqaab ah oo cusub lagu soo oogay suxufiyiin afartii bilood ee u danbeeyey: Maxamed Cumar Jaray, weriye ka tirsan Boramanews, waxa xukuntay bishii May Maxkamadda Gobolka Awdal, Cabdirashiid Cabdiwahaab Ibraahim, gudoomiyaha wargeyska Foore, Maxamed Maxamuud Yuusuf, tafa-tiraha Foore, Ibraahim Cusmaan Axmed, tafa-tiraha Hangoolnews, iyo Calimahdi Jibriil Xasan, Bulsho TV, waxa dacwado ciqaab ahi kaga socdaan Maxkamadda Gobolka Hargeysa.
Sidoo kale, sadex suxufi oo dacwadohoodu bilaabmeen ka hor April ayaa weli dacwadohoodu ka socdaan Maxkamadda Gobolka Hargeysa. Sadexdaas suxufi oo kala ah Cabdirashiid Nuur Wacays, gudoomiyaha wargeyska Hubsad , Siciid Khadar Cabdilaahi, tafa-tiraha Hubsad, iyo Muuse Faarah Jaambiir, gudoomiyah wargeyska Ogaal.
Waxaad halkan ka heli kartaa warbixinta oo dhamaystiran: http://www.hrcsomaliland.org/publication/190-august-2016-human-rights-centre-quarterly-report-on-media.
Talo-soo jeedin:
Xeer-ilaaliyaha Guud ee Qaranka:
Xaruntu waxaay u soo jeedinaysaa Xeer-ilaaliyaha Guud inuu:
Joojiiyo dacwadaha ciqaabta ah ee u ku soo oogayo suxufiyiinta iyo xadhiga suxufiyiinta;
Ogolaado in warbaahin cusub la furan karo iyo in kuwa jira cid lagu wareejin karo;
Ka qaado xayiradda wargeysyada xayiran ee Hubsad, Codka Shacakba, Xog ogaal iyo Haatuf;
Dib ula noqdo dacwadaha ciqaabta ah ee uu ku soo oogay suxifiyiinta hada dacwaddu ku socoto.
Garsoorka:
Xaruntu waxaay u soo jeedinaysaa Garsoorka inay:
Joojiyaan adeegsiga ay u adeegsanayaan Xeerka Ciqaabta suxufiyiinta, waxaay sidoo kale kula talinaysaa inay adeegsadaan Xeerka Saxaafadda iyo dastuurka.
Ururada Bulshada Rayidka ah:
Xaruntu waxaay u soo jeedinaysaa ururada bulshada rayidka ah inay:
Taageeraan suxufiyiinta Somaliland iyo warbaahinta;
Inay taageeraan in la joojiyo ciqaabta lagu soo oogayo saxaafadda iyo sidoo kale inay u ololeeyaan in xayiraada laga qaado wargeysayada xayiran.
Guleid Ahmed Jama
Gudoomiyaha Xarunta Xuquuqal Insaanka
Xafiiska Maankaab, Hargeysa
