Araweelo News Network
Mogadishu(ANN) Dablay hubeysan ayaa maanta barqadii magaalada Muqdisho ku dhaawacay ku xigeenka Xeer ilaaliyaha guud ee Maxkamadda Ciidamada Qalabka sida ee Dowladda Fedraalka.
sida ay sheegayaan wararka hordhaca ah ee ka imanaya magaalada Mogadishu, Weerarkan oo ka dhacay Xaafadda Wardhiigley ee magaalada Muqdisho waxaa lagu dhaawacay Cabdullaahi Xuseen oo ku magac dheer Mayoonge, iyadoo sidoo kale weerarkaas uu ku dhintay darawalkii Xeer ilaaliyaha.
Goob joogayaal ayaa sheegay in rag hubeysan oo watay gaadhi nooca raaxada ah ay rasaas oodda uga qaadeen gaadhiga uu la socday Mas’uulkaas ka tirsanaa Dowladda Fedraalka, waxayna durbadiiba ka baxsadeen goobta dablayda weerrarka fulisay.
Ciidamo ka tirsan Dowladda fedraalka ayaa muddo kadib goobta soo gaadhay, waxayna goobta ka qaadeen dhaawaca Xeer ilaaliyaha iyo Meydka darawalkiisa, mana jirto cid ay usoo qabteen weerarkaa iyo cid sheegatay.
Weerrarkan ayaa kusoo beegmaya iyadoo magaalada Muqdisho la daalaa dhacay qaraxyo iyo weerraro qorshaysan oo saacad walba ka dhaca, kuwaas oo lala beegsado saraakiisha Dawlada taagta daran ee Somalia, ciidamada AMISOM iyo sraakiisha hay’addaha caalamiga ah ee ka hawlgala muqdisho.
