Madaxwayne Siilaanyo Oo Wejigabax Kala Kulmay Munaasibadii Djibouti Iyo Dareenka Cadhaysan Ee Bulshada Somaliland Ka Bixiyeen

Araweelo News Network

Hargeysa(ANN)Madaxweynaha Somaliland Ahmed Siiraanyo iyo wafdigii uu hogaaminayey ee shalay u safray inay ka soo qaybgalaan caleemo-saarka madaxweynaha Djibouti Ismaaciil Cumar Geele ayaa karaamadii dadka iyo dalka Somaliland dhulka la dhacay ka dib markii ay oggolaadeen in lagu qaabilo baratakool aad u hooseeya oo aan u qalmin Madaxweyne huwan sharafta iyo haybada qaranka Somaliland.

Madaxweyne Siiraanyo waxa madaarka Djibouti kaga horyimi wasiirka waxbarashadda ee Djibouti xafladii caleemo saarkana waxa madaxweynihii dalka Somaliland uu oggolaaday in la dhinac fadhiisiyo Ugaaska Ciisaha agtiisa sidii oo uu yahay madax-dhaqmeed,iyadoo laga fogeeyey goobtii ay madaxweyneyaashu fadhiyeen.

Mr Siiraanyo iyo wafdi uu hogaaminayo oo galinkii dambee maanta ka soo laabtay Djibouti ayaa markay soo gaadheen madaarka Hargeysa ku wareegay diyaarad halkaas ku sugaysay taasoo u qaadday dhinaca Dubai, halkaasoo la filayo inay kusoo saxeexaan heshiis lagu wareejiyaano dekadda iyo madaarka Berbera shirkad uu Abbaan u yahay wiilka uu madaxweynuhu soddoga u yahay ee Baashe Cawil.

Dhinaca kale Bulshada Somaliland ayaa dareen cadho ah ka muujiyay sida loo bahdilay Madaxweynehooda, waxayna arrintan abuurtay doodo ay rayal caamka Bulshadu si weyn su,aalo isaga weydiinayaan sababta madaxweynohooda loogu bahdilay munaasibadaa ee loo dhexfadhiisiyay Odayaasha dhaqanka iyo guddoomiyayaasha maamul goboleedyada Somalia.