Araweelo News Network
Muqdisho(ANN)– Ra’iisal Wasaaraha Xukuumadda Federaalka ah ee Soomaaliya Mudane Xasan Cali Khayre ayaa galabta ka qeyb-galay Munaasabad agu xusayay sanad guuradii 94-aad ee ka soo wareegatay xiligii ay xurnimada qaadatay Jaamhuuriyadda Turkiga.
“Waxaan ugu hambalyeynayaa Dawladda, Shacabka iyo halgamayaashii dalka Turkiga maalinta xoriyadda dalkooda oo dadaal dheer ay u galeen sidii ay isaga qaadi lahaayeen heeryada gumeysiga” ayuu yidhi Ra’iisal Wasaare Khayre oo si gaar ah hambalyo ugu diray Madaxweynaha iyo Ra’iisal Wasaaraha dalkaas.
Ra’iisal Wasaare Xasan Cali Khayre, ayaa uga mahadceliyay garab istaaga dawladda iyo shacabka Soomaaliyeed, wuxuu tilmaamay in doorka Turkiga ee Soomaaliya uu wax weyn ka beddelay xaaladda Soomaaliya.
“Dawladda Turkiga waxaan si gaar ah ugu ammaaneynaa garab istaagoodii waqtigii adkaa iyo sidii ay indhaha caalamka noogu soo jeediyeen, xiliyadii ay dalkan soo wajahday xaaladaha adag oo ugu danbeysay qaraxii bishan ka dhacay Muqdisho oo door lama ilaa waan ah ay ka qaateen” ayuu mar kale yidhi Ra’iisal Wasaaraha.
Safiirka Turkiga u fadhiya Soomaaliya Oglan Bekar, ayaa xusay in Jamhuuriyada Turkiga ay ka go’an tahay mar waliba inay taageeraan Walaalahooda Soomaaliyeed ayna ku garab istaagaan sidii ay mar kale cagahooda isugu taagi lahaayeen.
Munaasadda ayaa waxaa sidoo kale ka qeyb galay, Ra’iisal Wasaare ku xigeenka dalka, Wasiirro ka tirsan Xukuumadda, Guddoomiyaha Gobolka Benaadir, Madaxweyne-yaasha dawlad gobolleedyada Soomaaliya iyo marti sharaf kale oo dhammaantood hambalyo ku aadan maalinta xoriyadda u diray dawladda iyo shacabka aynu walaalaha nahay ee Turkiga
—DHAMMAAD—-
