Araweelo News Network
Wasiirul-dawlaha Wasaaradda Macdanta iyo Tamarta Somaliland. Cabdiraxmaan Axmed Ismaaciil
Shirka caalamiga ee Somaliland lagu casuumay oo ah kii ugu weynaa noociisa ee lagaga hadlayo horumarinta iyo tayeynta tamarta adduunka, isla markaana ka qaybgalayaan in ka badan wufuud tiradoodu gaadhayso ilaa 2000 (laba kun) xubnood oo ka kala socda waddamada caalamka, waxa uu si rasmi ah uga furmayaa magaalada Vadodara ee dalka Hindiya, Jimcaha berri ee taariikhdu tahay 6 October 2016.
Wasiirul-dawlaha Wasaaradda Macdanta iyo Tamarta Md. Cabdiraxmaan Axmed Ismaaciil oo hoggaaminaya weftiga Jamhuuriyadda Somaliland uga qaybgalaya shirkaas, ayaa ka dhoofay Madaarka Hargeysa gelinkii dambe.
Wasiir Cabdiraxmaan oo khadka telefoonka Jamhuuriya kula soo xidhiidhay wax yar ka hor intii aanay weftigiisu ka duulin Madaarka Hargeysa gabbal-dhacii shalay, ayaa sheegay in weftiga Somaliland ee uu horkacayo oo martiqaad rasmi ah ka helay Wasaaradda Macdanta iyo Tamarta ee dawladda Hindiya ay ka qaybgalayaan shirweynaha ugu ballaadhan horumarinta tamarta adduunka oo ka furmaya magaalada Vadodara oo ka tirsan Gobolka Gujurat ee dalkaas.
“Waa markii ugu horreysay ee Jamhuuriyadda Somaliland ka qaybgasho shirweynaha horumarinta tamarta iyo korontada adduunka oo noqonaya kii ugu weynaa caalamka oo ay ka qaybgalayaan ergooyin ka badan 2000 qof oo ka kala socda dawladaha iyo shirkadaha tamarta ee waddamada dunida oo dhan, waxa soo qabanqaabisay Wasaaradda Macdanta iyo Tamarta ee dalka Hindiya oo bixisay martiqaadka dhammaan ka-qaybgalayaasha. Runtii arrintaasi waa tallaabo guul weyn u ah guud ahaan qaddiyadda madaxbannaanida Somaliland iyo horumarinta adeegyada tamarta iyo korontada,” ayuu yidhi Wasiirul-dawlaha Macdanta iyo Tamarta Somaliland.
Shirweynaha caalamiga ah ee horumarinta tamarta adduunka oo uu si rasmi ah u furi doono Ra’iisal-wasaaraha dalka Hindiya Mr. Narendra Modi’s, waxa muddada uu socon doono shan maalmood ah lagu falanqayn doonaa qoddobbo kala duwan oo la xidhiidha horumarinta ka-faa’iidaysiga tamarta iyo korontada
Xubnaha weftiga Somaliland uga qaybgalaya shirweynaha tamarta adduunka ee ka dhacaya dalka Hindiya oo lagu casuumay madax aad u tiro badan oo dalalka caalamka ka kala socda, waxa ay kala yihiin; Wasiiru-dawlaha Wasaaradda Macdanta iyo afar xubnood oo ah masuuliyiinta shirkadaha ugu waaweyn korontada ee ku yaal magaalooyinka Hargeysa, Boorama iyo Berbera.
