Araweelo News Network
Kismaayo (ANN)- Warar dheeraad ah ayaa ka soo baxaya khasaare ka dhashay duqaymo diyarado dagaal la eegteen fadhiisimada xoogagga Al-shabaab ku leeyihiin degaanno ka tirsan Gobolka Jubadda Hoose ee koonfurta Soomaaliya habeennimadii Salaasada.
Diyaarado nooca aan duuliyaha lahayn oo aan illaa hadda si cad loo ogeyn cidda leh, ayaa duqeymo xooggan ka fuliyey saldhigyada kooxda Al-shabaab ee ku yaal tuulada Galow-shimbir oo ku dhow degaanka Beerxaani oo qiyaastii 45km u jira magaalada Kismaayo ee xarunta Gobolka Jubadda Hoose.
Weerarka ayaa tibaaxay inay duqaymahaas ku dhaawacmeen ugu yaraan saddex qof oo ka mid ah shacabka ku dhaqan tuuladaas, balse lama oga khasaaraha weerarradaas ka soo gaadhay xoogagga Al-shabaab ee ku sugan xeryaha la duqeeyey.
Hase ahaatee, qaar ka mid ah dadka degaankaas ayaa saxaafadda u sheegay in duqeymahaasi ku habsadeen dhowr guri iyo saldhig Al-shabaab ku leeyihiin tuulada Galow-shimbir.
Dhinaca kale, masuuliyiinta maamul-goboleedka Soomaaliya ee Jubbaland, ayaa shaaca ka qaaday in duqaynta ka dhacay degaanka Galow-shimbir lagu dilay saraakiil iyo xubno ka tirsanaa Al-shabaab, inkastoo aanay sheegin tiro rasmi ah.
Ma jiro wax hadal ah saraakiisha Al-shabaab ka soo saareen duqaymaha cirka ee lala beegsaday xeryaha dagaalyahannadooda ee ku yaal koonfurta waddanka colaaduhu aafeeyeen ee Soomaaliya.
