Araweelo News Network
Axmed Muumin Seed Wasiirka Horumarinta Beeraha Somaliland
Hargeysa(ANN)-Wefti uu hoggaaminayo Wasiirka horumarinta beeraha Jamhuuriyadda Somaliland Mudane Axmed Muumin Seed ayaa socdaal ugu kicitimay Gobolada Bariga Somaliland.
Socdaalkan oo ay wasiirka ku wehelinayeen Masuuliyiin ka tirsan Wasaaradda horumarinta Beeraha, kuwaasi oo ay ka mid yihiin Agaasimaha Waaxda Mashaariicda Ibraahim Cumar Kaahin, Agaasimaha Waaxda Badbaadada Beeraha Maxamed Siciid (Maxamed Sudani), Agaasimaha Waaxda Saadaasha Hawada Cabdiqani Yuusuf Galaydh, Agaasimaha waaxda Gaadiidka iyo Cagafyada Ibraahim Carab Ceelaabe iyo masuuliyiin kale oo ka tirsan wasaaradda.
Weftiga ayaa socdaalkoodan ku soo maray Gobolka Togdheer gaar ahaan Xafiiska wasaaraddu ku leedahay Magaalo madaxda gobolka Togdheer ee Burco, isaga oo wasiirku shir is xog wareysi iyo sidii xafiisku u dar dar galin lahaa shaqada uu bulshada u hayo la yeeshay shaqaalaha Wasaaradda ee Gobolka Togdheer.
Isuduwaha Gobolka Togdheer ee Wasaaradda Beeraha ayaa wasiirka iyo weftiga la socda uga xogwaramay shaqada ay xafiiskoodu hayaan, isaga oo tilmaamay inay u heelan yihiin sidii ay shaqadooda u kordhin lahaayeen wakhti roobaadkan ay bulshadu beeraha qodanayso, waxaanu yidhi isaga oo arrimahaasi ka hadlaya “Mudane wasiir waxaanu diyaar u nahay inaanu kordhino shaqadayada maadaama oo xili roobaadkii beeraha la qodanayey lagu jiro, waxaananu bilawnay qodaalka iyo qorshihisii anaga oo ka bilawnay inaanu isla xafiiska qayb beeraha ka qodno”.
Wasiirka ayaa shaqaalaha Gobolka Togdheer ee Wasaaradda horumarinta beeraha kula dardaarmay inay dedaalaan wixii karaankooda ahna ka wasaarad ahaan la bar bar taagan yihiin “Waxaanu idinkula dar daarmaynaa inaad dedaalka xoojisaan wixii shaqo iyo karaankayaga taageero ahna waanu idinla bar bar taaganahay”
Wasiirka iyo weftiga uu hoggaaminayo ayaa waxa ay uga sii gudbeen Gobolka Saraar, waxaanay mareen Beeraha Deegaanada Waadamo goo iyo Caynabo ku teedsan.
Wasiirka oo bulshada beeralayda ah khudbad u jeediyey ayaa kula dar daarmay inay wax soo saarka sidii loo kobcin lahaa dedaalkeeda galaan, waxaanu yidhi isaga oo arrimahasi ka hadlaya “Waxa loo baahan yahay inaynu inaga oo aan hay’ad iyo dawlad waxba ka sugin isku tashano oo waxeena la soo baxno”.
