Araweelo News Network
Koox dad ah oo isku magacaabay inay u ololaynayaan nolosha dadka madow, ayaa mudaharaad ay abaabuleen ku galay madaarka la yidhaa London City Airport, kadibna isku dhex silsiladeeyey, taas oo keentay in muddo lix saacadood ah oo lala tacaalayey ka saarista madaarku ay joogsadeen in ka badan 120 duulimaad oo ka hawlgali lahaa madaarkaasi.
Kooxdan oo mudaharaadkooda bilowday 5:30 am subaxnimo ee Salaasadii shalay waxa la soo afjaray in boolisku ka furfuro silsiladihii ay isku xidhxidheen abbaaro 11:30 am maalinimo, iyadoo muddadaasi duulimaadyadii ka duuli lahaa ama soo degi lahaa madaarka laga dhigay wax la joojiyey iyo in meelo kale loo duway. Waxaanna ciidanka ammaanku xabsiga u taxaabeen ilaa sagaal qof oo ka mid ah dadkii mudaharaadka dhigayey.
Kooxdan ayaa qoraal ay ku baahisay Twitterka ku sheegtay in sababta mudaharaadkoodu tahay saamaynta tacadiga lagu hayo dadka madaw ee ku nool dalka Ingiriiska, “Dadka madow waa kuwa u horreeya ee dhinta, maaha kuwa u horreeya ee duula (diyaaradaha raaca) marka la eego xaaladdan qalalaasaha cimilada cunsiyadda ah. Marka dadka madow ee dalka Ingiriisku yihiin boqolkiiba 28% intooda badan waxa lagu sii daayaa hawada wasakhaysan marka loo eego dhiggooda caddaanka ah, waxaannu ognahay caddaalad-darrada ka jirta deegaanku inay tahay dhibaato cunsuriyeed,” ayey kooxda mudaharaaday ku yidhaahdeen qoraal ay soo saareen.
Arrinta kale ee xiisaha leh ayaa noqotay in dhabbaha madaarkan oo ay ku wareegsan yihiin biyo xayndaab u ahi ay kooxda mudaharaadka samaysay gudaha ugu soo galeen dabbaal ay kaga soo gudbeen biyahaasi, taasina waxay keentay in wax la iska waydiiyo sugnaanshaha ammaanka madaarkan oo ka mid ah kuwa ugu mashquulka badan ee Ingiriiska.