Araweelo News Network
Boosaaso (ANN)- Dagaal aad u culus oo khasaare badan dhaliyey, ayaa ciidammada maamul-goboleedka Soomaaliya ee Puntland iyo xoogag ka tirsan Al-shabaab ku dhexmaray gaaray degaan lagu magacaabo Af-urur oo ku yaal Gobol-xeebeedka Bari saqdii dhexe ee habeennimadii Isniinta.
Dagaalka saacado kooban socday ayaa la xaqiijiyey inay ku dhinteen ugu yaraan 7 qof oo dhinacyada dagaallamay ah.
Guddoomiyaha degaanka Af-urur Mr. Maxamed Geeddi Saalax oo u warramay laanta afka Soomaaliga ee idaacadda VOA-da shalay, ayaa sheegay in ciidammada Puntland dagaal aad u xooggan oo muddo saacado ah socday la galeen dagaalyahannada Al-shabaab oo weerar culus ku soo qaaday degaankiisa.
‘’Aad baa leysaga caabiyey weerarka Al-shabaab oo ciidammo iyo shacab looma kala hadhin, waxaanay weerarka soo qaadeen saqdii dhexe ee xalay [habeen hore], iyadoo ujeedadooduna ahead in ay dadka dhibaateeyaan ‘’ ayuu yidhi Mr. Geeddi.
Waxa uu intaa ku daray, inay dagaalkaas ku dileen afar ka mid ah dagaalyahannada Al-shabaab ee weerarka soo qaaday.
Degaanka Af-urur oo ciidanka maamulka Puntland saldhig weyn ku leeyihiin waxa uu qiyaastii 70km dhinaca galbeedka xigaa magaalo-xeebeedda Boosaaso.