Araweelo News Network
Hargeysa (ANN)- Wasiirka Hawlaha Guud, Guryeynta iyo Gaadiidka ee Jamhuuriyadda Somaliland Md. Cali Maxamed Xasan (Cali Mareexaan), ayaa sheegay in ictiraafka Somaliland ku iman karo hadba sida aynu xidhiidh ula yeelano dalalka caalamka.
Wasiirka oo hadla ka jeediyey xuska maalinta dhallinyarada Somaliland ee 20 February oo lagu qabtay caasimadda Hargeysa, waxa uu dheeraaday saldhigga iyo maalgashiga waddanka Imaaraadka Carabtu ka samaynayo dalka Somaliland, gaar ahaan magaalada Berbera ee xarunta Gobolka Saaxil iyo dhibaatooyinka dhaqaale ee qaadku leeyahay.
“Dhallinyarada waxaan kula dardaarmayaa waxa weeyaan sida aad la wada socotaan dalkeenu mustaqbalkiisu aad iyo aad buu u fiican yahay, waxaana ugu wacan dhallinyarada oo boqolkiiba 70% ay dhallinyaro tahay, taasina waa ididiilo fiican, waxaana fiican in aad iyo aad looga waaniyo balwadaha, umaddeena waxaa ku furan qaad oo $700,000 (toddoba boqol oo kun oo doollar) sannadkii la sii sanayo qaad, waxaana weeyi dadkii waaweynaa ee ka horeeyey ay u horsadeen, dhaqaalihii iyo naftii iyo caafimaadkiiba wuu dilayaa,” ayuu yidhi Wasiirka Hawlaha Guud ee Somaliland.
Waxa kaloo uu intaas ku daray; “Waxyaabaha ugu weyn ee dalka immika ka taagan ee lagu kala aragti duwan yahay waxa weeyi horumar dalka ka socda. Dalkeenu ma haysto ictiraaf, laakiin haddii aynaan dunida xidhiidh la yeelan inaan ictiraaf dalka imanayn, maahmaah ayaa ahayd “xaglo laaban xoolo kuma yimaadaan.” Innagoo iska fadhina ictiraaf iman maayo waa inay dunidu inoo timaad shalay (maalintii Axadda) waxaan dhegaysanayey nin madax ah oo dawladda Jabuuti u hadlaya faa’iidada ay Jabuuti u keentay saldhigyada ay siisay wadammada kala duwan.”
“Dhaqaaleheenu 80% waxa uu ku xidhan yahay waddanka Imaaraadka, tijaarteenu intay ka tiro leegtahay waxay joogta Imaaraadka oo ay xafiisyo ku wada leedahay, marka waxaan odhan lahaa waar yaan dadkeena la baqdin galin, waar ninka Xuutiyiinta u hiilinaya ee toddobada dal ee Khaliijka ka hor imanayaa waxaan leeyahay waar fulay isagaaba geesiya ee ummadda Ilaahay ha inagu soo jeedin,” ayuu yidhi Wasiir Cali Mareexaan.
Wasiirka Hawlaha Guud, ayaa sidoo kale ka hadlay xuska maalinta dhallinyarada Somalilnad ee 20 February, waxaannu yidhi; “Waxaan halkan uga hambalyeynayaa dhammaan dhallinyaradda reer Somaliland meel kasta ay joogta, waxaan leeyahay hambalyo taariikhda dheer ee laga sheekeyey ee ay leedahay maalintani ee 20kii February 1982kii raggii xogogaalka u ahaaba halkan ka sheekeyey ee markaa waaweynaa, laakiin anigu maalintaas Burco ayaan joogay dhawr cisho ka dib ayuu mudaharaad ka dhacay biriishka Burco, kan labaad maahee kii hore ayaa labada koone ciidamo la odhan jiray Daraawiish oo berigaas jiri jiray oo xoog weynaa ay labada koone istaageen oo dhallinyaradii biriishka ka daadatay baan ku jiray barigaa, markaa taarikhdaa dheer ee la soo maray waxaa gunteedii iyo gaba gabadeedii maanta aynu hadhsanaynaa qaranimada, madaxbannaanida, nabadgalyada iyo horumarka dalka ka jira ee aynu maanta ku tallaabsanay, taasay tahay midhaheedi in la wada ilaashado oo xoog iyo xoog loo ilaashado.”