Araweelo News Network
Darasalaam(ANN)-Safiirka Soomaaliya ee dalka Tanzania Mudane Maxamed Xasan Cabdi ayaa xaqiijiyay in Xabsiyadda dalkaa laga soo daayay dad Soomaaliyeed oo ku dhibaateysnaa, kuwaas Oo mudda dheer ku jiray Xabsiyada dalkaa.
Ambassador Maxamed Xasan, ayaa sheegay in dadkaasi ay gaadhayaan 20 qof oo ay ku jiraan 4 carruur ah.
Sida uu sheegay Muwaadiniintan Soomaaliyeed ayaa ku jiray xabsiyo ku yaalla Magaalooyinka Taanga iyo Lindi ee Dalka Tanzania, balse kulan uu safiirku la qaatay wasiirka arrimaha gudaha Tanzania Mwiguli Najambe iyo Xuseen Baashe oo ah xildhibaan reer Tanzania ah oo asalkiisu Soomaali yahay, ayaa lagu guuleystay in la sii daayo dadka soomaaliyeed oo ku xukunnaa xabsiyo u dhexeeya 3 bilood ilaa 3 sano.
Muwaadiniintan Soomaaliyeed ee laga sii daayay xabsiyada Tanzania ayaa la filayaa inay maanta soo gaadhaan magaalada Muqdisho.
