Araweelo News Network
Muqdisho (ANN) Masuuliyiinta hay’adaha garsoorka maamulka Muqdisho, ayaa shaaca ka qaaday in markale Baanka Dhexe ee Soomaaliya laga xaday lacag boqollaal kun oo doollar ah.
Garsoore Mukhtaar Nuur Abuukar oo ka tirsan Maxkamadda Gobolka Banaadir oo warbaahinta kula hadlay magaalada Muqdisho shalay, ayaa sheegay in lacag dhan $204 kun oo doollar lagala baxay laanta Baanka Dhexe ee Soomaaliya ku leeyahay dekedda weyn ee Xamar.
Garsoore Abuukar waxa uu masuuliyadda xatooyadaas u xambaariyey Agaasimaha Laanta Bangiga ee Dekedda Muqdisho Mr. Cabdi Maxamed Abuukar, kaas oo uu sheegay inay xigto dhow yihiin Guddoomiye-ku-xigeenka Baanka Dhexe ee Soomaaliya marwo Maryan Macallin oo uu ku eedeeyey in ay ka soo horjeesatay in la xidho sarkaalka lacagta badan lunsaday.
Dhowaan ayey ahayd markii dhac baahsan lagula kacay xarunta Baanka Dhexe ee Soomaaliya oo lagala baxay lacag ka badan nus malyuun dollar.
