Araweelo News Network.
Hargeysa(ANN)-Madaxweynaha Jamhuuriyadda Somaliland Muuse Biixi Cabdi oo hadal ka jeediyay shirka dhaqaalaha ee maanta ka furmay Magaaladda Hargeysa, ayaa dhaliilo u jeediyay masuuliyiinta xukuumaddiisa ee soo agaasimay shirkaa.
Masuuliyiinta sagaal wasaaradood oo ay hormood u yihiin Wasaaraddaha Maaliyadda iyo Qorshaynta, ayaa soo qaban qaabiyay shirkaa oo sida lagu sheegay ajandaha lagaga hadlayo dhaqaalaha Qaranka, oo la doonayo in lagu faaqido fursadaha jira iyo caqabadaha ganacsiga.
Shirkaa waxa ka qayngalay masuuliyiinta Hay’addaha xukuumadda ee kala duwan, ganacsato iyo aqoonyahan, kuwaas oo hadalo ka jeediyay madasha.
Haseyeeshee Madaxweyne Biixi, ayaa hadal kooban oo furitaanka shirka uu ka jeediyay ku cannaantay masuuliyiinta wasaaraddaha iska lahaa qaban qaabada shirka in aannay mudnayn inuu ku hanbalyeeyo 100%, isagoo taas sabab uga dhigay dhaliisha uga soo baxday madasha shirka markii uu isha mariyay dadka kasoo qabgalay.
“Masuuliyiinta Wasaaraddaha shirka dhaqaalaha qaranka soo qaban qaabiyay waxaan hanbalyaynayaa 50%, sababtoo ah dastuurka ayaa I faraya, inaan kala haddho, waayo? Dastuurku wuuu ina yidhi, “Muwaadiniintu way siman yihiin, shaqooynka iyo xilalka dalka, ” Sagaalka wasaaradood ee ay hoggaaminayaan Dr. Sacad (Wasiirka Maaliyadda) iyo Dr Buuxane, waxaa ka maqan 50% dadkii shaqadaa qaban lahaa ee muwaadiniinta ahaa.” Ayuu yidhi, Madaxweyne Biixi.
Sidoo kale, Madaxweyne Biixi wuxuu sheegay in aannay siyaasadda xukuumaddu sidaa ahayn, isagoo yidhi, “Hablaha haddii loo diiday siyaasadii iyo xilalka waaweyn oo aynu ognahay xagga dhaqaalaha in ay ragga ka fiican yihiin nagama kiin qabanayn inaad noo soo xushaan 100 nin oo aannay gabadh keliya ku dhexjirin, waxaana ka dhiman shaqada aad qabteen caqligii, fekerkii iyo waxqabadkii 50%,waxaanse filayaa in kuwa danbe la saxayo.” Ayuu yidhi,
Madaxweyne Biixi, wuxuu sheegay in aannu isagu dhaqaalaha wax baddan ka aqoon, balse wuxuu soo jeediyay in saddex qodob xoogga la saaro, kuwaas oo kala ah, dhibaatooyinka Abaraaha ee sababa Biyo la’aanta iyo naabaad-guurka deegaanka, korodhka magaalooyinka, helitaanka Laydh qiimihiisu iyo in nollosha dadka loo jiheeyo dhanka xeebaha, wuxuuna Madaxeynuhu tusaale usoo qaatay sida ay cimiladu isu beddeshay iyo dhibaatooyinka deegaanka. Sidaa awgeed wuxuu usoo jeediyay shirka in arrimahaa la saaro ahmiyada.
Please share with your friends the news and information provided by Araweelo News Network.
Published by Araweelo News Network.
Follow us Twitter@Araweelonews
Facebook@AraweeloNews
By Arraale M Jama Freelance Journalist and Human Rights activist.
Araweelo News Network.
info@araweelonews.com
