#Araweelo_News_Network.
Tehran (ANN)- Hoggaamiyaha Falastiinyiinta Dagaalka kula jira Israel iyo xullufadeeda Maraykanka ayaa wacad ku maray in aannay Israel guul ka gaadhayn dagaalka, “Waxaan idiin ballan qaadayaa inaan noqon doono kuwa ku guulaysta dagaalka,” sidaa waxa yidhi, Ziad al-Nakhalah oo la hadlay suxufiyiinta, sida ay sheegtay wakaaladda wararka ee AP, oo soo xiganaysay Wakaaladda kale ee IRNA.
Hadalkaa ayaa jeediyay kaddib kulankii uu la yeeshay wasiirka arrimaha dibadda ee Iran Hossein Amirabdollahian, kaas oo ahaa mid muhiim ah oo ahmiyad weyn u lahaa,wuxuuna uga mahad celiyay Iran taageerada ay siiso Falastiiniyiinta.
In kasta Iran aannay si toos ah u faragelin dagaalka Israel iyo Xamaas, balse muddo dheer waxay Israel iyo xullufadda Maraykanku ku sifaysaynayeen innay tahay cadawga Israel. si kastaba ha ahaatee, khubaradu waxay sheegeen in Iran ay taageero dhaqaale iyo mid siyaasadeedba siiso Islamic Jihad iyo Xamaas, oo ah kooxda maamusha Qaza, ikuwaas oo ahaa kuwii qaaday weerarkii 7-dii October ee Israel lagu dilay in ka badan 1,200 oo qof, laguna qafaashay 250 qof, balse Isael jawaabta ay bixisay noqotay xasuuqa, go’doominta iyo burburinta Qaza oo ay ku nafwaayeen kumanaan qof oo caruur u baddab, iyadoo dagaalka socday dhawrka Bilood aannay weli Israel wax libin ah kasoo hoyn, wallow Ra’iisal wasaaraha Israel Benjamin Netanyahu xallay sheegay in ay miiska wada hadalka Xamaas kusoo laabanayaan.
“Diblamaasiyadda firfircoon ee Jamhuuriyadda Islaamiga ah ee Iran waxay door weyn ku lahayd qeexidda mowqifka iska caabinta Falastiin,” al-Nakhalah ayaa laga soo xigtay isagoo sidaa u sheegay warbaahinta.
Labada dhinac Iran iyo Hoggaamiyaha Jihad, ayaa ka wada hadlay horumaradii ugu dambeeyay ee dagaalka, iyo “dambiyada dagaalka iyo xasuuqa” Israel, “sida ay soo werisay IRNA.
Sidoo kale, IRNA, ayaa sheegtay in magaalada Tehran uu ku sugnaa xilligaa hogagamiyaha Xamaas Ismail Haniyeh oo la kulmay al-Nakhalah, isagoo sidoo kale wadahadalo gooni gooni ah la yeeshay madaxda Iran dhowrkii maalmood ee la soo dhaafay.
Warbaahinta Iran ayaa ku warantay in al-Nakhalah iyo Haniyeh, intii lagu guda jiray kulankoodii laba geesoodka ahaa ee Jimcihii ka dhacay Tehran ay sheegeen in guul laga gaadho wada xaajood kasta oo aan toos ahayn oo lala yeesho Israa’iil ay ku xidhan tahay dhammaadka dagaalka Israa’iil ee Qaza, ka bixitaanka ciidamada Israa’iil ee dhulka, soo noqoshada dadka barakacay. iyo sii wadida bixinta gargaarka bini’aadantinimo.
Waxay sidoo kale carrabka ku adkeeyeen baahida loo qabo “xoojinta iska caabinta dhammaan dhinacyada” waxayna u mahadceliyeen Xuutiyiinta Yemen taageeradooda, iyo sidoo kale kooxaha Ciraaq iyo Lubnaan ee ka soo horjeeda Israel.
Horaantii todobaadkan, Gollaha Ammaanka ee Qaramada Midoobay ayaa qaraar ka soo saaray Qaza, kaas oo dalbanaya xabbad joojin degdeg ah, iyo sidoo kale in si degdeg ah oo shuruud la’aan ah loo sii daayo dhammaan la haystayaasha.
ku dhawaad lix bilood oo dagaal ah ayaa burburiyay kaabayaasha muhiimka ah ee Qaza, oo ay ku jiraan Cusbitaallada, iskuulada iyo guryaha iyo sidoo kale waddooyinka, nidaamyada bullaacadaha iyo korantada. Duqeymaha cirka iyo weerarka dhulka ee Israa’iil ayaa waxaa ku dhintay in ka badan 32,000 oo Falastiiniyiin ah, sida ay sheegeen mas’uuliyiinta caafimaadka maxalliga ah. Dagaalada ayaa barakiciyay in ka baddan 80% dadka Qaza waxayna ku riixeen boqolaal kun oo macaluul qarka u saaran, Qaramada Midoobay iyo hay’addaha gargaarka caalamiga ah ayaa sidaa sheegay, iyagoo ka digay macaluul iyo xannuuno ka dilaaca Qaza.
Please share with your friends the news and information provided by Araweelo News Network.
Published by Araweelo News Network.
Follow us on Twitter@Araweelonews
Follow us and Like on Facebook@AraweeloNews
Follow us on /instagram@araweelonews
Follow us on TikTok / Tiktok.com/@araweelonews
Follow us on /araweelonews.tumblr.com
SUBSCRIBE to our YouTube channel for more videos: https://www.youtube.com/c/AraweeloTv
Written by Arraale M. Jama, a freelance journalist and human rights activist.
info@araweelonews.com
