<
#Araweelo_News_Nerwork.
Cario (ANN)-Xoghayaha arrimaha dibadda ee Maraykanka Antony Blinken ayaa socdaalkiisii ugu dambeeyay ee gobolka ku tagay bariga dhexe, isagoo sheegay in uu diiradda ku saari doono hindisaha xabad joojinta Qaza ee Washington iyo mustaqbalka dhulka falastiiniyiinta dagaalka kadib.
Wakaaladda Aljazeera oo soo sharaxaysa socdaalka xilligan ee Blinken ayaa sheegtay inuu magaalada Qaahira kula kulmay madaxweynaha Masar Abdel Fattah el-Sisi Isniintii, isagoo dib u cusbooneysiiyay baaqyada Maraykanka ee dagaalyahanka Falastiiniyiinta ee Xamaas innay aqbasho heshiis nabadeed oo uu soo bandhigay madaxweyne Joe Biden dabayaaqadii bishii May.
Laxidhiidha: Maraykanka Oo Ku Dudduucaya Xamaas Xabbad-joojin Dhalisay Dareen Khiyaamo Ah
Warka ayaa intaa ku daray in Diblumaasiga ugu sareeya Maraykanka Blinken ayaa wada hadalo dheeri ah ku yeelan doona Israel, Qatar iyo Jordan todobaadkan, wallow Israel waxba ka beddelin mawqifkeedii ay hore ugu gacan saydhay qorshaha Biden.
Laxidhiidha: Maraykanka Oo Ku Dudduucaya Xamaas Xabbad-joojin Dhalisay Dareen Khiyaamo Ah
Ka hor intii aannu Blinken ka dhoofin Masar, wuxuu la hadlay warfidiyeenka, wuxuuna si badheedh ah ugu eeddeeyay Xamaas in ay dagaalka sii dheeraynayso, isaga oo sheegay in kooxda falastiiniyiintu ay yihiin kuwo ka baxsan gobolka oo aan ogolayn heshiiska Maraykanka.
“Fariintayda ku socota dawladdaha gobolka oo dhan, dadka gobolka oo dhan, haddii aad doonaysaan xabbad-joojin, ku cadaadi Hamas inay aqbalaan heshiiska,” sidaa ayuu u sheegay suxufiyiinta.
Laxidhiidha: Israel: Netanyahu Oo Ganafka Ku Dhiftay Inuu Jooojiyo Hawlgalka Millateri ee Israel U Qorshaysan
In kasta oo Blinken uu u sawiray qorshaha xabbad joojinta soo jeedinta Biden, markii Biden uu heshiiska ka dhigay dadweynaha, wuxuu sheegay inay ahayd qorshe Israa’iil ah.
Soo jeedintu waxay arki doontaa in lix toddobaad ay hakad galaan dagaalka iyo siidaynta qaar ka mid ah maxaabiista Israa’iil ee ku jira Qaza iyo maxaabiista Falastiiniyiinta ee ku jira jeelasha Israa’iil, taas oo awood u siinaysa wada-xaajood xabbad-joojin joogto ah.
Hase yeeshee, saraakiisha Maraykanka ayaa ku adkaysnaya in Israa’iil ay ogolaatay soo jeedinta, laakiin mas’uuliyiin kala duwan oo Israa’iil ah oo uu ku jiro Ra’iisal Wasaare Benjamin Netanyahu, waxay wacad ku mareen inay sii wadi doonaan dagaalka ilaa laga cidhibtirayo Xamaas.
Maalmo ka hor intii aannu Biden ku dhawaaqin hindisihiisa, sarkaal sare oo Israa’iil ah ayaa sheegay in millaterigu uu ka dagaalami doono Qaza ilaa ugu yaraan dhamaadka sanadka 2024.
Dagaalyahanka Xamaas ayaa sheegay inay aqbali doonnaan oo keliya heshiis horseedaya in dagaalka lagu soo afjaro, ciidamada Israa’iilna si buuxda looga saaro Qaza.
Xamaas ayaa ku celisay mowqifkeeda Isniintii kaddib markii madaxa siyaasadda Ismail Haniyah uu magaalada Doxa kula kulmay mas’uuliyiin ka tirsan ururka Jihaad Islaami ee Falastiin, kuwaas oo ah koox yar oo hubaysan oo ka barbar dagaalanta Xamaas.
“Labada wefdi waxay ka wadahadleen wada xaajoodyada dadban iyo dadaallada lagu soo afjarayo dagaalka, iyagoo ku nuuxnuuxsaday in heshiis kasta uu ku jiro xabbad-joojin joogto ah, ka bixitaan buuxda ee marinka Qaza, dib-u-dhiska, soo afjarida go’doominta iyo is-dhaafsiga culus shacabka maxaabiista ay lagama maarmaan tahay innay ku cadaato,” sidaa ayaa lagu sheegay bayaanka Xamaas ee mawqifka qorshaha Maraykanka.
Dhinaca kale, Xukuumadda Israel ee wadaaga ah, ayaa ku kala aragti duwan qorshaha Biden ee xabad joojinta, taas oo sababtay in uu xilka iska casilo mid ka mid ah wasiiradda safka hore ee dagaalka Qaza oo ka tirsan kooxda midigta Fog ee xagjirka ah.
Benny Gantz oo ahaa wasiir muhiim ah, ayaa dhaleecayn u jeediyay raysal wasaare Benjamin Netanyahu, isagoo yidhi, “Netanyahu waxa uu naga hor istaagayaa in aan u gudubno guusha dhabta ah. Taasi waa sababta aan uga tagayno dawladda degdegga ah maanta, annagoo wadno culus leh laakiin kalsooni buuxda leh, “Gantz ayaa sidaa ku sheegay shir jaraa’id oo laga soo daayay telefishinka Israel Axaddii. Sida laga soo xigtay Aljazeera.
Arrinta is casilaadiisa ayaa kusoo beegnatay, iyadoo dagaalka Qaza uu socday muddo siddeed bilood ah, isla markaana horseeday guuldaradii dawladda Israa’iil iyo xullufadda Mataykanka soo waajahday.
“Kulanku wuxuu sidoo kale arkay doodaha dadaallada Masar ee ku aaddan sidii gargaarka bini’aadanimo loogu keeni lahaa dadka Qaza, si taas loo gaasdho, madaxweynuhu wuxuu ku nuuxnuuxsaday baahida loo qabo dadaallada caalamiga ah si meesha looga saaro caqabadaha gargaarka bani’aadamnimada,” ayaa lagu yidhi, war kasoo baxay kulanka kaddib.
Ugu yaraan 37,124 qof ayaa lagu dilay 84,712 kalena waa lagu dhaawacay dagaalka Israa’iil ee Qaza tan iyo bishii Oct, 2023, sida ay sheegeen saraakiisha caafimaadka Falastiin.
Israa’iil ayaa xayiraad adag kusoo rogtay saadka cunnada, biyaha, saadka caafimaadka iyo shidaalka Qaza, iyadoo Qaramada Midoobay iyo hay’addaha gargaarka ay ka digayaan in dhulkaas uu qarka u saaran yahay macaluul.
Israel ayaa dagaalka bilowday kaddib markii Xamaas ay hogaamisay weerar ay ku qaaday Koonfurta Israel 7-dii October, halkaasi oo ay ku dishay ugu yaraan 1,139 qof, sida lagu sheegay tirokoob ay Aljazeera ka soo saartay tirakoobka Israel, waxa ayna la wareegtay ku dhawaad 250 kale oo lahayste ahaan ah.
Qiyaastii kala badh maxaabiistii ayaa lagu sii daayay heshiis xabbad joojin ah oo toddobaadle socday bishii November 2023 . Ku dhawaad 120 maxbuus ayaa ku hadhay Qaza, oo ay ku jiraan 43 ay Israa’iil sheegtay inay dhinteen.
Fadlan la wadaag saaxiibadaa oo warbxinaha iyo wararka ay soo gudbiyaan shabakaddaha Araweelo News Network.
Follow us Twitter@Araweelonews
Facebook@AraweeloNews
www.araweelonews.com
www.araweelonews.net
www.araweelonews.com/archi/
By Arraale M Jama Freelance Journalist and Human Rights activist.
info@araweelonews.com.
