Araweelo News Network
Hargeysa(ANN)-Maxkamadda gobolka Maroodijeex, ayaa ansixisay xubnaha gollaha deegaanka ee Hargeysa, kadib markii ay heshay natiijada Doorashada Gollaha Deegaanka Hargeysa ee Guddida Doorashooyinku usoo gudbiyeen.
Maxkamadda gobolka Maroodijeex, waxa kasoo xaadiray 17-ka xildhibaan, waxaana goob-joog ka ahaa Guddoomiyaha Maxkamadda iyo Garsoorayaasha Maxkamadda Gobolka iyo sidoo kale saraakiil ka socday saddexda xisbi Qaran, taliyaha ciidanka Booliska Somaliland iyo xildhibaanada loo doortay ee Gollaha deegaanka Caasimadda Hargeysa.
Xubnaha cusub ee gollaha Deegaanka Hargeysa 16 Jun 2021. Araweelo News Network.
Guddoomiyaha maxkamadda gobolka Maroodijeex Cabdi Qawdhan Cabdi, ayaa sheegay ka hor inta aan la ansixin xubnaha gollaha deegaanka ee cusub in aannay jirin waxa dacwad ah oo la xidhiidha doorashada gollaha deegaanka Maroodijeex oo soo gaadhay maxkamadda gobolka, sidaas awgeed ay ansixinayaan natiijadii ay hore ugu dhawaaqeen Guddiga Doorashooyinka Qaranku.
Markaa kaddib Guddoomiyaha Maxkamadda Gobolka Maroodijeex, Cabdi Qawdhan Cabdi, ayaa ku dhawaaqay ansixinta natiijada xubnaha Doorashada Gollaha Deegaanka Caasimadda Hargeysa, isagoo sheegay in hadda wixii ka danbeeya ay hashooda qabsanayaan xubnaha cusub.
Dhinaca kale, xubnaha gollaha deegaanka Hargeysa, ayaa loo qorsheeyay in ay fadhigooda u horeeya maalinta beri 17 Jun 2021, yeesheen si ay u doortaan Maayar iyo Maayar ku xigeen, iyadoo Maayarka Cusub ee Caasimadda loo cimaamaday Cabdikariim Axmed Moogge oo kasoo baxay Xisbiga Mucaaradka ee WADDANI, isla markaana ahaa murrashaxa ugu codka badan golayaasha deegaanka, isagoo helay codad gaadhaya 26, 000, iyo dheeraad, isla markaana dhigay rikoodh cusub oo dhanka doorashada gollayaasha deegaanka ah.
Published by Araweelo News Network.
Follow us Twitter@Araweelonews
Facebook@AraweeloNews
By Arraale M Jama Freelance Journalist and Human Rights activist.
Araweelo News Network.
info@araweelonews.com
