Araeeelo News Network
Madaxweyne Siilaanyo iyo Madaxweyne ku xigeenka Seylici
Hargeysa (ANN)- Madaxweynaha Jamhuuriyadda Somaliland Md. Axmed Maxamed Maxamuud (Siilaanyo), ayaa digreeto uu soo saaray ku caddeeyey in doorashada Madaxtooyadu qabsoomayso 13 November 2017.
Sida lagu sheegay warsaxaafadeed ka soo baxay Madaxtooyada Somaliland, waxa Madaxweyne Siilaanyo sheegay inuu helay qoraal Komishanka Doorashooyinku ku cayimeen waqtida doorashada, sidaa darteedna uu digreeto ku soo saaray muddada loo qabtay qabsoomida doorashada Madaxtooyada oo uu xusay inay lagama maarmaan u tahay hannaanka dimuqraadiyadeed ee Somaliland.
“Madaxweynaha Jamhuuriyadda Somaliland Mudane Axmed Maxamed Silaanyo, waxa uu xeer Madaxweyne oo summadeedu tahay JSL/M/XERM/249-4866/062017 ku cayimay xilliga Doorashada Madaxweynaha iyo Madaxweyne-ku-xigeenka Jamhuuriyadda Somaliland la qaban doono.
Madaxweynuhu:
Markuu arkay: Qodobka 90aad ee Dastuurka Jamhuuriyadda Somaliland;
Markuu arkay: Qodobka 83aad ee Dastuurka Jamhuuriyadda Somaliland;
Markuu arkay: Qodobka 9aad ee Xeerka Wax-ka-beddelka iyo Kaabista Xeerka Doorashooyinka Madaxtooyada iyo Goleyaasha Deegaanada ee Xeer Lr. 20/ 2001;
Markuu helay: Qoraalka Guddida Doorashooyinka Qaranka ee summaddiisu tahay KDQ/XK/060/2017 ee ku taariikhaysan 08/06/2017, Ujeeddadiisuna tahay cayimaadda Doorashada Madaxweynaha iyo Madaxweyne-ku-xigeenka Jamhuuriyadda Somaliland, si waafaqsan qodobka 9aad (2) ee Xeerka Wax-ka-beddelka iyo Kaabista Xeerka Doorashooyinka Madaxtooyada iyo Goleyaasha Deegaannada ee Xeer Lr. 20/ 2001;
Markuu arkay: Go’aanka Golaha Guurtida Jamhuuriyadda Somaliland ee summaddiisu tahay GG/JSL/Go’aan-02/03/2017, kuna taariikhaysan 06/03/2017, kaas oo lagu sameeyey muddo korodhsiimo ku eeg 13/12/2017;
Markuu arkay: Qoraalka Maxkamadda Dastuuriga ah ee summaddiisu tahay MD/DD/01/2017, kuna taariikhaysan 16/02/2017, ujeeddadiisuna tahay Qaraarka Dib-u-eegista Qaraar Fasiraad lam.MS/DD/02/2015 ee 18/08/2015;
Markuu ku qancay: In ay lagama-maarmaan u tahay Hannaanka Dimuqraadiyadda iyo Doorashooyinka in la cayimo xilliga Doorashada Madaxweynaha iyo Madaxweyne-ku-xigeenka Jamhuuriyadda Somaliland.
Wuxuu soo saaray
Xeerkan oo lagu go’aamiyey in taariikhdu marka ay tahay 13/11/2017, ay noqoto maalinta ay qabsoomayso Doorashada Madaxweynaha iyo Madaxweyne-ku-xigeenka Jamhuuriyadda Somaliland,” ayaa lagu yidhi warsaxaafadeedka uu ku saxeexan yahay Mr. Naasir Yuusuf Daahir oo ah Agaasimaha Saxaafadda Madaxtooyada Jamhuuriyadda Somaliland, ahna Ku-simaha Afhayeenka Madaxweynaha.
